ကဆုန်လပြည့်နေ့အကြောင်း မှတ်သားဖွယ်ရာ
ဒီနေ့က ဗုဒ္ဓဘာသာဝင်တို့ရဲ့ နေ့ထူးနေ့မြတ်ကြီးဖြစ်တဲ့ ကဆုန်လပြည့်နေ့ ဖြစ်ပါတယ်။
"ဗျာ၊ ဖွား၊ ပွင့် စံ ဤလေးတန် မှတ်ရန် ဗုဒ္ဓနေ့"ဆိုပြီး မှတ်သားခဲ့ဖူးပါတယ်။
ဗျာ - ကဆုန်လပြည့်နေ့မှာ ဗျာဒိတ်တော်ကို ခံယူတော်မူပါသည်။ ဖွား - ကဆုန်လပြည့်နေ့မှာ ဖွားမြင်တော်မူပါသည်။ ပွင့်-ကဆုန်လပြည့်နေ့မှာ ဘုရားပွင့်တော်မူပါသည်။ စံ - ကဆုန်လပြည့်နေ့မှာ ပရိနိဗ္ဗာန်စံဝင်တော်မူပါသည်။
(၁) ဘုရားအလောင်းတော် သုမေဓာရှင်ရသေ့သည် ဤဘဒ္ဒကမ္ဘာ၌ လေးဆူမြောက်ဖြစ်သော ဂေါတမအမည်ဖြင့် ဘုရားစင်စစ် ဧကန်ဖြစ်လိမ့်မည်ဟု ဒီပင်္ကရာ မြတ်စွာဘုရားထံမှ နိယတဗျာဒိတ်ကို ကဆုန်လပြည့်နေ့တွင် ခံယူခဲ့သည်။ (၂) မဟာသက္ကရာဇ် ၆၈-ခု ကဆုန်လပြည့်နေ့တွင် ဂေါတမဘုရားအလောင်းတော် သိဒ္ဓတ္ထမင်းသားအား ဖွားမြင်တော်မူခဲ့သည်။ (၃) မဟာသက္ကရာဇ် ၁၀၃-ခု ကဆုန်လပြည့်နေ့ အရုဏ်တက်ချိန်တွင် ဂေါတမဘုရားအလောင်းတော်သည် သဗ္ဗညုတဉာဏ်တော်ကို ရရှိ၍ ဘုရားဖြစ်တော်မူခဲ့သည်။ (၄) မဟာသက္ကရာဇ် ၁၄၈-ခု ကဆုန်လပြည့်နေ့တွင် မလ္လာမင်းတို့၏ အင်ကြင်းဥယျာဉ်၌ ဘုရားရှင် ပရိနိဗ္ဗာန် စံဝင်တော်မူခဲ့သည်။
ထူးခြားချက် ၄ ချက်နဲ့ ပြည့်စုံတဲ့ ဗုဒ္ဓဘာသာဝင်အပေါင်းတို့က ကဆုန်လပြည့်နေ့အား ဘုရားနေ့ဟု သတ်မှတ်ခဲ့ကြပါတယ်။ ဒီလိုနေ့ရက်အချိန်အခါမှာ သဗ္ဗညုတရွှေဉာဏ်တော်ကို ရတော်မူဖို့ ဗောဓိပင်အား အမှီပြုကာ တရားအားထုတ်ခဲ့ပါတယ်။ အဲ့ဒါကြောင့် ဒီလိုနေ့ရက်မှာ ဗုဒ္ဓဘာသာဝင်တို့ဟာ ဗောဓိပင်အား ရေသွန်းလောင်းခြင်း၊ စတုဒိသာကျွေးခြင်း စတဲ့ ကုသိုလ်ကောင်းမှုတို့ကို ပြုလုပ်ကြပါတယ်။
နှစ်စဉ် ဗုဒ္ဓဘာသာဝင်တို့ ကျင်းပတဲ့အလေ့အထ ညောင်ရေသွန်းပွဲဟာ ယနေ့ထက်တိုင် ရှင်သန်ဆဲဖြစ်ပါတယ်။
Graphic : Htet Aung
Ref : ဗုဒ္ဓဘာသာ နေ့ထူးနေ့မြတ်များ
