Game - Greatness, Action, Management, Emotion

Game ဆိုတဲ့ စကားလုံးအနက်အဓိပ္ပါယ်ကတော့ အတွေးများစေတာမို့ ဒီတစ်ပတ်အတွက်တော့ Game ဆိုတဲ့စကားလုံးကို လက်ဆောင်ပေးချင်ပါတယ်။ Game ဆိုတဲ့စကားလုံးကို အများစုလည်း ရင်းနှီးနေပြီးသားဖြစ်မှာပါ။ သင်တန်းတက်တဲ့အခါပဲဖြစ်ဖြစ် Training ပေးတဲ့အခါပဲဖြစ်ဖြစ် Game ဆိုတဲ့ Activity လေးကိုထည့်လိုက်ရင် အားလုံးက ပျော်ရွှင်စွာ ပါဝင်လာကြပါတယ်။ ဒါကြောင့် ဒီစကားလုံး‌လေးက ကျယ်ပြန့်တာမို့ အမြဲဆောင်ထားသင့်တဲ့စကားလုံးဆိုလည်း မမှားပါဘူး။ အခု စကားလုံးက အကုန်လုံးဆက်စပ်နေတာလေးကို မှတ်သားစေချင်ပါတယ်ဗျာ။ "G - Greatness - မြတ်နိုးမှု"ဆိုပြီးမှတ်ထားစေချင်ပါတယ်။ မြတ်နိုးမှု ဆိုတော့ ကျွန်တော်တို့ လုပ်ငန်းခွင်မှာပဲဖြစ်ဖြစ် ကိုယ်လေ့လာနေတဲ့ပညာရပ်ပဲဖြစ်ဖြစ် မြတ်နိုးဖို့ လိုပါတယ်။ ကိုယ်မြတ်နိုးတဲ့အလုပ်ကို လုပ်နေရရင် ဘယ်လိုပဲ အခက်အခဲကြုံကြုံ ကျွန်တော်တို့ ခံနိုင်ရည်စွမ်း ရှိပါတယ်။ ချစ်ခြင်းတွေနဲ့ ကြည်ရင် အားလုံးဟာ လှနေတာပဲလေ။ မြတ်နိုးစရာ ကောင်းနေတယ်ဆိုတာ သိပါလိမ့်မယ်။ ဒီတော့ ကျွန်တော်တို့ လုပ်နေရတဲ့အရာတွေမြတ်နိုးဖို့ဆိုရင် ချစ်ခြင်းနဲ့ ကြည့်တတ်ရင် ကိုယ့်စွမ်းဆောင်ရည်တွေဟာ ပိုမိုတိုးတက်လာစေမှာပါ။ "A - Action - လှုပ်ရှားမှု"ပါ။ လှုပ်ရှားမှုတွေ တက်ကြွစွာ ဖြစ်လာဖို့ဆိုရင် အပေါ်က မြတ်နိုးမှုဆိုတာ လိုပါတယ်။ ပြောရရင် လူတော်တော်များများက တက်တက်ကြွကြွ လှုပ်ရှားကြတာကို ဝိုင်းဝန်း အားပေးနေကြပါတယ်။ တကယ်က တက်တက်ကြွကြွ လှုပ်ရှားဖို့ဆိုရင်လည်း စိတ်တွေ ကြည်လင်နေမှ။ တစ်ခါတစ်လေ အခက်အခဲကြုံလာတဲ့အခါ ပင်ပန်းတဲ့အခါ ကျွန်တော်တို့ရဲ့ တက်ကြွမှုတွေဟာ အနည်းငယ် လျော့ရဲလာပါတယ်။ ဒီလျော့ရဲမှုတွေ မဖြစ်စေဖို့အတွက်ဆို ကျွန်တော်တို့ အလုပ်တွေကို မြတ်နိုးဖို့လိုတာပါလို့။ "M - Management - စီမံခန့်ခွဲမှု၊ စီမံအုပ်ချုပ်မှု"ပါ။ နေ့စဉ် လုပ်နေရတဲ့အလုပ်တွေမှာလည်း စီမံခန့်ခွဲမှုတွေလိုပါတယ်။ ဘယ်အချိန်မှာ ဘာလုပ်မယ်။ ဒီနေ့အတွက် ဘာတွေလုပ်စရာရှိတယ်။ အဲ့လုပ်စရာတွေကို အချိန်ဘယ်လောက်ယူပြီး ပြီး‌မြောက်အောင်လုပ်မလဲ။ ဒါက အချိန်ကိုစီမံခန့်ခွဲတာကို ပြောပြတာပါ။ နောက်တစ်ခုကတော့ လူတွေကိုစီမံအုပ်ချုပ်မှုပါ။ ဘယ်နေရာမှာ ဘယ်လိုလူက အဆင်ပြေတယ်။ ဘယ်လိုထားရမယ်။ တကယ်လို့ စီမံအုပ်ချုပ်မှု မှားတဲ့အခါ ကိုယ်လုပ်နေတဲ့အလုပ်ကို များစွာ ထိခိုက်နိုင်ပါတယ်။ ဒီတော့ ကျွန်တော်တို့တွေ အချိန်ကို စီမံရမှာဖြစ်သလို လုပ်ငန်းပိုင်းဆိုင်ရာ လူတွေကိုပဲဖြစ်ဖြစ် ကိစ္စရပ်တွေကိုပဲဖြစ်ဖြစ် စီမံအုပ်ချုပ်မှု ကောင်းမွန်တဲ့အခါ ကိုယ်လိုချင်တဲ့နေရာကို ရောက်ရှိသွားမှာပါ။ အချိန်ကို ကောင်းစွာ စီမံနိုင်မယ်ဆိုရင်တော့ ကိုယ့်လုပ်ငန်း ခရီးလမ်းဟာ ဒီထက်ပိုပြီးမြန်ဆန်လာမှာပါ။ "E - Emotion - စိတ်ခံစားမှု"ပါ။ အပေါ်မှာ ပြောခဲ့တာတွေကို အဆင်ပြေပြေ လှုပ်ရှားနိုင်ဖို့ဆိုရင် စိတ်ခံစားမှုက အရေးကြီးတဲ့အရာတစ်ခုပါ။ ဘာလို့ဆို ကျွန်တော်တို့ လုပ်ဆောင်ချက်တိုင်းမှာ စိတ်ခံစားမှုတွေပါပါတယ်။ ဒေါသဖြစ်တဲ့အခါ ဒေါသသံနဲ့ ‌ဒေါသတွေနဲ့ စီမံခန့်ခွဲလိုက်ရင် တစ်ခုပြီးတစ်ခု အဆင်မပြေတာတွေ ဖြစ်လာမှာပါ။ ဒီတော့ စိတ်ကြည်နူးနေမယ်ဆိုရင် စိတ်ခံစားမှုတွေကို ထိန်းချုပ်နိုင်မယ်ဆိုရင် စီမံခန့်ခွဲကောင်းလာမယ်။ ဒီတော့ တက်တက်ကြွကြွ လှုပ်ရှားလာမယ်။ တက်ကြွလှုပ်ရှားမှု အားကောင်းတော့ အလုပ်မှာ ပျော်ရွှင်လာရင်း တဖြည်းဖြည်းနဲ့ မြတ်နိုးလာမှာပါ။ ဒီတော့ ဒီစကားလုံးလေးကို ဆက်စပ်နေတာမို့ အမြဲသတိထားပြီး ဆောင်ရွက်သွားနိုင်ပါစေလို့ ပြောပြချင်ပါတယ်ခင်ဗျာ။ နောက်ဆုံးပြောချင်တာကတော့ အားကစားနည်းတွေမှာ ဒီဖြစ်စဉ်အားလုံးလဲ ပါဝင်တာမို့ အားလုံးပဲ သယ်ဆောင်သွားစေချင်ပါတယ်။ ဒီလို အင်္ဂလိပ်စကားလုံး လက်ဆောင်လေးတွေကို အပတ်စဉ်တိုင်း တင်ဆက်သွားမှာမို့ နောက်အပတ်တွေမှာ ဘယ်လိုစကားလုံးလေးတွေ တင်ဆက်ပေးသွားဦးမလဲဆိုတာ စောင့်မျှော်ပေးကြပါဦးခင်ဗျာ။ ဖတ်ရှုခံစားပေးကြတဲ့အတွက် ကျေးဇူးတင်ပါတယ်။ ဒီစာလေးကိုဖတ်လိုက်လို့ တစ်စုံတစ်ရာ အမြင်လေးတွေ တိုးသွားမယ်ဆိုရင်လည်း သင့်သူငယ်ချင်းတွေကို ဝေမျှပေးလိုက်ကြပါဦး။ Graphic Design - Thet Wai Htun